Stor interesse i Kvæfjord

Det er stor interesser for å få etablert ein tømmerkai i Kvæfjord kommune i Troms. Førre veke stilte representantar for kommunen saman med skognæringa  for å drøfte vidare arbeid med saka.
Tekst og foto: Helge Kårstad

Ein av dei siste
Det er utbetra og nybygd kring 35 tømmerkaiar i landet. Etter det vi kjenner til gjenstår 2-3 anlegg langs kysten, og anlegget i Kvæfjord er såleis eit av desse. Neste søknadsfrist for statstilskot er 15. august 2024.

Troms: eit viktig skogfylke
Det er satsa mykje på skogreising i denne regionen, skogen veks noko seinare enn lenger sør i landet, men både kvalitet og driftstilhøve er dokumentert å vere minst like gode. Særleg vil vi framheve gunstige driftstilhøve med knapt trong for å nytte taubane. Det er også påpeika at det vart planta svært tett under skogreisinga, gjerne under meteren mellom granplantene. Bruk av barrotsplanter gav også nærast 100% tilslag etter plantinga. Noko tynning er difor aktuell i ein del område.
Samtidig registrerar vi store utmarksareal av god, djup jord med mogleik for å utvide skogarealet med gran. Svært mykje lauvskog av bjørk og ikkje minst furuskog av høg kvalitet høyrer også med i biletet frå Troms.

God plassering av tømmerkaien
Dekningsområdet for ein tømmerkai i Kvæfjord er i tillegg til eigen kommune tømmer frå skogane i  kommunane Tjeldsund og Harstad. Totalt gjeld dette eit granskog-areal på kring 115 000 daa og eit venta hogstkvantum inntil 55 000 kubikkmeter i perioden fram til 2050. Det er særleg etter 2035 at vi vil få den største auken i hogstkvantumet.
Tømmerkaien er planlagt bygd i eit regulert område som heiter Lamhagan i Vik, ca. 5 km frå kommunesenteret Borkenes. Kvæfjord kommune eig deler av det regulerte området på 20 daa og vil stå som søkjar, eigar og driftar av tømmerkaien. Tømmerkaien vil bli bygd som ein fleirbrukskai der størstedelen av kaien er prioritert til tømmer.
Plasseringa av kaien er god, både i høve til tømmertilgangen og ikkje minst i høve til at kaien vil ligge i le for herskande vindretning og samtidig gunstig plassert i skipsleia.

Søknad vil bli sendt
Under møtet i Borkenes førre veke vart det uttrykt stor interesse frå kommune til å få etablert denne fleirbrukskaien der tømmerdelen vil vere heilt sentral. Det vil difor bli sendt ein søknad om tilskot til Landbruksdirektoratet innan 15. august i år.

Vi tek med nokre bilete frå det einaste sagbruket i regionen; Sæteråsen Sag & Høvleri. På sett og vis eit av mange prov på at skogreisinga i området har lukkast ved at tømmeret er ettertrakta i marknaden.